नाशिक : ‘चित्रपट चावडी’ या उपक्रमांतर्गत २१ जुलै रोजी सायंकाळी साडेसहा वाजता सुप्रसिद्ध फ्रेंच दिग्दर्शक एरिक रोहमर यांचा ‘ए समर्स टेल’ हा चित्रपट दाखविण्यात येणार आहे. चित्रपटासाठी विनामूल्य प्रवेश असणार आहे.
मुंबईच्या यशवंतराव चव्हाण प्रतिष्ठानचे नाशिक विभागीय केंद्र, विश्वास को-ऑपरेटिव्ह बँक लिमिटेड, विश्वास ज्ञानप्रबोधिनी अँड रिसर्च इन्स्टिट्यूट, सारस्वत बँक व रेडिओ विश्वास, ९०.८ कम्युनिटी रेडिओ यांनी संयुक्तपणे हा कार्यक्रम आयोजित केला आहे.
विविध ऋतूंवर आधारित कथानकांच्या मालिकेतील, एरिक रोहमर यांची ‘ए समर्स टेल’ ही नर्मविनोदी प्रेमकथा आहे. गणिताचा तरुण विद्यार्थी, पण गिटारवादनाचा छंद असलेला गॅस्पार्ड व त्याची मैत्रीण लेना यांच्या स्पेनमधील भेटीदरम्यान त्याची आणखी दोन स्त्रियांशी गाठ पडते. तीन वेगवेगळ्या स्त्रियांच्या भेटीमुळे गोंधळात पडलेला गॅस्पार्ड त्यातून कसा मार्ग काढतो याविषयीची ही रंजक कथा आहे. १९६६मध्ये प्रदर्शित झालेला हा चित्रपट एक तास ५७ मिनिटांचा आहे.
एरिक रोहमर तत्कालीन नवीन चित्रपटांच्या लाटेमधील अपरिचित, पण महत्त्वपूर्ण दिग्दर्शक आहेत. चाळीसहून अधिक दर्जेदार चित्रपटांचे दिग्दर्शन त्यांनी केले आहे. खास फ्रेंच ठसा असलेला एरिक यांचा चित्रपट थेट आशयाला भिडणारा, सर्वसामान्यांच्या आयुष्यातील सहज घटना टिपणारा आहे. त्यांच्या चित्रपटातून आपल्याला सौंदर्यदृष्टी, नातेसंबंधाची जाणीव सहजपणे जाणवते.
‘ए समर्स टेल’ हा चित्रपट बघण्यास रसिकांनी जास्तीत जास्त संख्येने उपस्थित राहावे, असे आवाहन कार्याध्यक्ष विश्वास ठाकूर, सचिव डॉ. कैलास कमोद, कोषाध्यक्ष डॉ. सुधीर संकलेचा, सदस्य कविता कर्डक, राजवर्धन कदमबांडे, रऊफ पटेल, अॅड. नितीन ठाकरे व विक्रम मोरे यांनी केले आहे.
कार्यक्रमाविषयी :
‘ए समर्स टेल’ चित्रपटाचे सादरीकरण
दिवस : शुक्रवार, २१ जुलै २०१७
वेळ : सायंकाळी साडेसहा वाजता
स्थळ : डिझास्टर मॅनेजमेंट अँड ट्रेनिंग हब (विश्वास लॉन्स),
ठाकूर रेसिडेन्सी, विश्वास को-ऑप. बँकेसमोर, सावरकरनगर, गंगापूर रोड, नाशिक - ४२२०१३
